“Party dangte’n sokarna an chan laiin a bik takin Aizawl khawpui chhunga kan kawngpuite hi a chhe ngai lo. Aizawl khawpui chhungah raipuar leh damlo, emergency a phurh ngam an ni tawh lote hi sorkar inthlah dah vang liau liau a ni,” an ti.

“ZPM an sorkar hnuah ṭhal laia inbuatsaihna hun zau tak a awm chunga kawngpui thawm ṭhat hna an thawk duh lo leh a thawm ṭhat thenkhat pawh a beitham lutuk hi mak kan ti a, PWD Minister kan dem tak zet a ni” an ti.

MPCC chuan, Mizoram hmun hrang hrangah kawng chhe lutuk avangin mipuite châk laknaah harsat nasa tak an tawk tih an sawi. Mizoram ei leh bar chawk luhna ber Silchar to Aizawl road-te pawh bungrua phur motor te an rawn kal duh tawh lo ang tih hlauhawm khawpin a chhe hle, an ti a.

“Khaw tam takah Maxi Cab-te kawngpui chhiat avanga an service duh lo leh kawng a chhiat avanga sikul naupangte'n kawng an zawh ta hial hi sorkar mualphona a ni tih hre nawn a, a rang thei ang bera hma la nghal tura PWD Minister an phut thu an tarlang.

Chuanlam tur zawng ringawt a, in sawifiah reng ringawt loa, hna tak tak thawk tan tawh tura Sorkar an duh thu an tarlang.